GRÍMSÁ OG TUNGUÁ

Grímsá og Tunguá í Borgarfirði eru vel þekktar sem einar af bestu laxveiðiám landsins. Grímsá rennur úr Reyðarvatni, inn af Lundarreykjadal. Í það falla smáár og lækir, að nokkru leiti uppsprettuvatn, sem gefa Grímsá nokkurn lindarársvip. Tunguá sem er mikið vatnsminni, á upptök sín í vestanverðu Kvigyndisfelli og er hrein dragá.

Samanlagt vatnasvið ánna er 313 ferkílómetrar. Heildarlengd Grímsár er 42 km. en laxgeng er hún 32 km.

Heildarlengd Tunguár er 20 km. þar af laxgengi hlutinn 11 km.  Meðalveiði í báðum ánum árin 1974 til 2008 er 1357 laxar.  Mest árið 2008, þá 2223, en minnst árið 1982, þá 717 laxar.

Laxveiði hefur lengi verið stunduð í Grímsá, og í Egils sögu er sagt frá mannskæðum bardaga á Laxafit, sem Björn Blöndal telur hafa verið austurbakka Langadráttar. Í elstu máldögum Reykholtskirkju, (1236) er frá því greint að hún eigi 5 hluta veiði í Grímsá, og gangi 3 frá. Einnig að kirkjan eigi hlaupagarða í Grímsá og ástemmu í Reyðarvatnsósi. Langt er nú síðan ástemman og hlaupagarðarnir hafa verið nýttir en enn í dag á Reykholtskirkja 5/8 hluta allrar veiði í Laxfossi.

Fyrst er vitað um stangaveiði í Grímsá árið 1862, og voru þar enskir menn á ferð. Eftir það nýttu englendingar neðri hluta árinnar að mestu leiti allt fram á fyrri heimstyrjöld og að nokkru leiti á millistríðsárunum einnig. Frá seinna stríði og fram yfir 1970 nýttu landeigendur sjálfir veiðina eða leigðu hana ýmsum innlendum aðilum. 1971 er síðan stofnað veiðifélag um báðar árnar og vatnasvæðið síðan leigt Stangaveiðifélagi Reykjavíkur frá og með árinu 1972. Samkvæmt þeim samningi tók leigutaki að sér að byggja veiðihús við Grímsá og var það tekið í notkun vorið 1973. Eftir að samningur veiðifélagsins við S.V.F.R. rann út sá félagið sjálft um alla sölu veiðileyfa fram til loka veiðitímans 2004, en hefur frá þeim tíma leigt árnar til Hreggnasa ehf, fram til hausts 2014.

Vefsíða:

www.hreggnasi.is

www.angling.is/grimsa

Netfang: jon@hreggnasi.is

Sími: 898 2230

Veiðifélagið  Hreggnasi

Sími: 577 2230

VEIÐITÖLUR VIKU FYRIR VIKU

HEILDARVEIÐI FYRRI ÁRA

VIKA FYRIR VIKU 2020