Veiðitölur
Smelltu hér til að gerast áskrifandi að angling fréttum
25. september 2020

Nýjar veiðitölur

Komnar eru nýjar veiðitölur á vef Landssambands Veiðifélaga. Samantektin er frá veiði í lok síðasta miðvikudags 23. september síðastliðinn. 

 

Samantektin er seinna á ferðinni en ekki hafa borist veiðitölur úr öllum ám og í sumum tilvikum skýrist það af því að veiðihús hafa lokað og fyrir vikið er minni viðvera og tækifæri að sækja upplýsingar úr veiðibók/veiðibókum. En tölur skila sér að lokum og verða þær settar inn þegar þær berast. Alls hafa borist lokstölur úr 14 vatnakerfum og von er á fleirum fljótlega.

 

Eystri-Rangá er efst á listanum og komin í alls 8130 laxa, skilaði vikuveiðin samtals 114 löxum. Veiðin er sú mesta frá upphafi og 657 löxum betur en mesta veiði var árið 2007 þegar alls veiddust 7473 laxar. 

 

Ytri-Rangá er í öðru sæti og komin í alls 2431 laxa og skilaði vikuveiðin 129 löxum sem er mesta vikuveiðin í þessari samantekt og aukning um 59 laxa frá vikunni á undan.

 

Í þriðja sæti er Miðfjarðará sem er efst á lista þeirra vatnakerfa sem byggja veiði ekki alfarið á seiðasleppingum. Samtals hafa veiðst 1705 laxar og skilaði síðasta veiðivika alls 79 löxum.

 

Í fjórða sæti er Affall í Landeyjum en samtals hefur veiðst 1597 og skilaði veiðivikan 96 löxum sem er 17 löxum meira en vikunna á undan.

 

Í fimmta sæti er Selá í Vopnafirði en þar lauk veiði í samtals 1258 löxum.

 

 

Hér fyrir neðan eru 10 efstu vatnakerfin þar sem heildarveiði og vikuveiði er tilgreind.

 

 

1.   Eystri-Rangá 8130 laxar - vikuveiði 114 laxar.

 

2.   Ytri-Rangá 2431 laxar - vikuveiði 129 laxar.

 

3.   Miðfjarðará 1705 laxar - vikuveiði 79 laxar.

 

4.   Affall í Landeyjum 1597 - vikuveiði 96 laxar.

 

5.   Selá í Vopnafirði 1258 laxar - Lokatala

 

6.   Haffjarðará 1126 laxar - Lokatala.

 

7.   Þverá og Kjarará 1055 laxar - vikuveiði 9 laxar.

 

8.   Langá 1054 laxar - vikuveiði 41 laxar.

  

9.   Hofsá í Vopnafirði 1017 laxar - Lokatala.

 

10. Norðurá 979 laxar - Lokatala.

 

 

Ekki hafa borist veiðitölur úr öllum vatnakerfum en þær verðar settar inn þegar þær berast.

 

Hér er hægt að skoða veiðitölur úr 50 vatnakerfum.

 

Næst verður veiðitölum safnað í lok veiði miðvikudags 30. september.

 

Athygli er vakin á því að er velkomið að senda inn lokaveiðitölur úr öðrum vatnakerfum og við birtum þær hér á vefnum. Gott væri að fá silungsveiði og stangarfjölda með.

 

Veiðitölur eru birtar með þeim fyrirvara að við úrvinnslu veiðibóka hjá Hafro getur veiðitala breyst lítilega.

 

Hægt er að senda inn veiðitölur á bjorn@angling.is eða hringja/senda sms í síma 852-3398