Veiðitölur
Smelltu hér til að gerast áskrifandi að angling fréttum
10. mars 2020

Veiðileiðsögn

Námskeið í veiðileiðsögn hófst miðvikudaginn 4 mars en það er Ferðamálaskóli Íslands býður upp á þetta námskeið í annað sinn fyrir áhugasama aðila sem vilja gerast leiðsögumenn innlendra og erlendra veiðimanna í ám og vötnum landsins.

 

Veiðileiðsögunámið er hagnýtt nám og nýtist í senn starfandi leiðsögumönnum og áhugasömum aðilum sem hafa áhuga á að sinna slíkri leiðsögn. Námið gefur innsýn í grunnatriði og ítarlegri þætti er varða veiðileiðsagnarþjónustu. Sérfróðir leiðsögumenn kenna undirstöðuatriði stangveiða og sérfræðingar miðla fróðleik um fiskana er við sögu koma og vistfræði þeirra.

 

 

Hluti þeirra tuttugu nemenda sem sækja námskeið í veiðileiðsögn þetta árið.

 

Námskeið hófst á kynningu námsefnis en það var Reynir Friðriksson, sjávarútvegsfræðingur sem fór vel í gegnum það sem framundan er. Í kjölfarið kom Björn Theodórsson, fiskeldisfræðingur og hélt erindi um sögu og starfsemi Landssambands veiðifélaga og jafnframt erindi um sögu stangveiða og nytja.

 

Reynir Friðriksson, sjávarútvegsfræðingur.

 

Meðal kennsluefnis eru undirstöðuatriði er varða líffræði og lífshætti íslenskra ferskvatnsfiska. Fjallað er um árstíðabundnar göngur fiska, gönguhegðun í ferskvatni og sjó og samspil þátta er varða m.a. fæðugöngur. Farið er yfir þætti er varða samskipti leiðsögumanna við veiðimenn allt frá komu þeirra í veiðihús, meðan á dvöld þeirra stendur og þar til dvöl hans lýkur.

 

Farið verður í tveggja daga ferð í Eystri Rangá þar sem tekin verður fyrir meðal annars kasttækni með einhendum og tvíhendum.

 

Lögð er áhersla á Skyndihjálp og áfallahjálp þar sem litið er sérstaklega til þátta er tengjast hættum við ár og vötn.

 

Farið er yfir handtök er varða frágang á afla eftir veiði, blóðgun og flökun á fiski. Samhliða verður farið yfir grunnþætti sem varða meðhöndlun fiska með hliðsjón af "veiða og sleppa".

 

Allir leiðbeinendur hafa áratuga reynslu sem leiðsögumenn eða vísindamenn hver á sínu sviði.

 

Námið er alls 90 stundir og fer bæði fram í kennslustofu og á bökkum Eystri Rangár.

 

Hluti nemenda í veiðileiðsögn í Eystri-Rangá árið 2019

 

 

Leiðbeinendur námskeiðs í veiðileiðsögn árið 2020 eru:

 

Þröstur Elliðason, fiskeldisfræðingur - Strengir

 

Erlendur Steinar Friðriksson, sjávarútvegsfræðingur

 

Jóhannes Hinriksson, rekstrarstjóri – Ytri Rangá

 

Reynir Friðriksson, sjávarútvegsfræðingur

  

Björn Rúnarsson, Vatnsdalsá.

 

Ólafur Vigfússon, Veiðihornið

 

Björn Theodórsson, fiskeldisfræðingur og leiðsögumaður

 

Kristinn Helgason, Landsbjörg

 

Sr. Bragi Skúlason, Landspítalinn