Veiðitölur
Smelltu hér til að gerast áskrifandi að angling fréttum
26. nóvember 2019

Nýr fiskvegur við Sólheimafoss í Laxá í Dölum

Haustið 2019 var nýr fiskvegur tekinn í notkun við Sólheimafoss í Laxá í Dölum, en Laxá er fjölmörgum veiðimönnum vel kunn fyrir mikla aflasæld á laxi. Sólheimafoss er  í um 25 km fjarlægð frá sjó. 

 

Fossinn er rúmlega 4 m að hæð, en ákjósanleg búsvæði til laxahrygningar og uppeldis á ungviði auk veiðistaða er að finna ofan við fossinn.  Þannig er talið að um 6 km búsvæði opnist ofan við fossinn sem geti aukið framleiðslugetu vatnasvæðisins um 15 – 20% þegar að landnámi lax er lokið.

Fiskvegur í Laxá við Sólheimafoss 18.september 2019. Mynd ©Sigurður Már Einarsson
 

Fiskvegurinn var hannaður af Vífli Oddsyni verkfræðing en Vífill hefur hannað fjölmarga fiskvegi hérlendis.  Framkvæmdina annaðist fyrirtækið Kolur í Búðardal og var fiskvegurinn var búinn til með því að móta klöppina með fleyg og þannig búin til þrep 2 -2,5 m að lengd með 50 cm hæðarmun.  Með þessu móti ber minna á fiskveginum í umhverfinu miðað við steypta fiskvegi og umhverfi við Sólheimafoss er minna raskað en ella. 

 

Lax fór strax að ganga fossinn haustið 2019 og framkvæmdin virðist þannig hafa gengið að óskum. 

 

Nú hafa verið reistir á bilinu 75-80 fiskvegir í íslenskum straumvötnum sem opnað hafa um þriðjung af því búsvæði sem opið er fyrir lax og aðra göngufiska á Íslandi og hafa sambærilegar framkvæmdir því haft mikil áhrif á stofnstærð laxa á Íslandi.

 

Þessi pistill er eftir Sigurð Má Einarsson, fiskifræðing hjá ferskvatnslífríkissviði Hafrannsóknarstofnunar.