Veiðitölur
Smelltu hér til að gerast áskrifandi að angling fréttum
5. september 2019

Nýjar veiðitölur

Komnar eru nýjar veiðitölur á vef Landsambands Veiðifélaga. Samantektin er frá veiði í lok miðvikudags 4. september. Veiðin síðustu veiðiviku ber þess merki að liðið er fram á haust og styttist í að  lokatölur berist úr þeim ám þar sem veiði hófst fyrst í sumarbyrjun.

 

Ekki hafa borist veiðitölur úr öllum vatnakerfum en þær verða settar inn þegar þær berast. Það getur verið erfitt að ná tölum í hús þegar vel er liðið á veiðitímabilið, eins og lesa má í frétt með samantektinni fyrir viku síðan.

 

Breyting varð á listanum okkar eftir síðustu veiðiviku en Ytri-Rangá fór upp um eitt sæti og er nú í þriðja sæti.

 

Sem fyrr er Eystri-Rangá efst á listanum okkar með samtals 2782 laxa en síðasta veiðivika skilaði 130 löxum. Það munar 1391 löxum á henni og Selá í Vopnafirði sem er í 2. sæti með samtals 1391 laxa.

 

Í öðru sæti er Selá í Vopnafirði með samtals 1391 laxa sem er 78 löxum meiri veiði en á svipuðum tíma í fyrra en þá höfðu veiðst 1283 laxar.  Veiðivikan gekk vel, skilaði 91 löxum og  er veiðin nú orðin 51 löxum meiri en loka veiðitala í fyrra sem var 1340 laxar.

 

Í þriðja sæti er Ytri-Rangá en þar er veiðin komin í samtals 1364 laxa og síðasta veiðivika skilaði góðri veiði, samtals 180 löxum.

 

Í fjórða sæti er Miðfjarðará sem komin er í samtals 1324 laxa. Síðasta veiðivika gekk vel og skilaði 131 löxum sem er töluverð aukning miðað við veiðivikuna á undan. 

 

Í fimmta sæti er Þverá/Kjarará en þar er veiðin komin í 907 laxa. Síðasta veiðivika gekk vel og skilaði 120 löxum og nálgast vatnakerfið 1000 laxa markið.

 

 

Hér fyrir neðan eru tíu efstu vatnakerfin.

 

Til fróðleiks þá er veiði borin saman við svipaðan tíma í fyrra (05.09.2018) og í sviga má sjá hve miklu munar. 

 

1.  Eystri-Rangá 2782 laxar - vikuveiði 130 laxar. (-704)

 

2.  Selá í Vopnafirði  1391 laxar - vikuveiði 91 laxar. Búið að veiða 51 lax umfram lokatölu í fyrra en þá veiddust alls 1340 laxar.

 

3.   Ytri-Rangá 1364 laxar - vikuveiði 180 laxar. (-1813)

 

4.   Miðfjarðará 1324 laxar - vikuveiðin 131  laxar. (-1036) 

 

5.   Þverá/Kjarará 907 laxar - vikuveiði 120 laxar. (-1537)

 

6.   Urriðafoss í Þjórsá 746 - vikuveiði 11 laxar. (-511)

 

7.   Laxá á Ásum 682 laxar - vikuveiði 65 laxar. (-7).

 

8.  Blanda 632 laxa - vikuveiði 30 laxar. (-229)

 

9.  Hofsá og Sunnudalsá 624 laxar - vikuveiðin 41  laxar. (-5).

   

10. Haffjarðará  568 laxar - vikuveiði 36 laxar.  (-934)

 

Á stóra listanum er að finna veiðitölur þar sem veiðin er nálgast eða er komin upp fyrir loka veiðitölu í fyrra. Hér eru nokkrar ár þar sem veiðin hefur gengið vel þetta veiðitímabilið.

 

Svalbarðsá er komin í samtals 416 laxa sem er 79 löxum umfram lokatölu í fyrra en þá veiddust samtals 337.

 

Skjálfandafljót er komið í samtals 310 laxa sem er 60 löxum umfram lokatölu í fyrra sem var 250 laxar. Jafnframt hafa þar veiðst 150 silungar.

 

Það gengur vel í Hafralónsá sem er komin í samtals 321 laxa sem er 127 löxum meira en lokatala í fyrra sem var 194 laxar.

 

Deildará er komin í samtals 191 laxa sem er 29 löxum meira en lokatala í fyrra sem var 162 laxar.

 

Fnjóská er komin með 149 laxa og 215 silunga. Laxveiðin er komin 11 löxum umfram lokatölu í fyrra sem var 126 laxar og stutt að silungsveiðin fari upp fyrir lokatölu í fyrra sem var 213 silungar.

 

Laxá á Ásum er komin með 682 laxa og skilaði síðasta veiðivika 64 löxum. Nú vantar einungis 20 laxa til að jafna veiðina í fyrra sem var 702 laxar.

 

Hér er hægt að skoða lengri lista með veiðitölum úr tæplega 50 vatnakerfum. Sjá nánar hér. 

 

 

Söfnun veiðitalna væri ekki möguleg nema fyrir liðsinni fjölda aðila sem vikulega taka saman veiðitölur og má þar nefna veiðiverði, veiðileiðsögumenn, matreiðslumenn, starfsfólk veiðihúsa, leigutaka, veiðiréttarhafa, árnefndarfólk og fleiri. Eiga allir þessir aðilar þakkir skildar fyrir. 

 

Ágætt að hafa eftirfarandi í huga ef grunur leikur á að veiddur lax sé eldislax. Mjög mikilvægt er að sleppa honum ekki og tilkynna viðkomandi stofnun.

 

Hér er hægt að kynna sér leiðbeiningar um samanburð á villtum lax og eldislax hér.

 

Geta má þess að hreistursýnataka af veiddum fisk er eitt mikilvægasta framlag veiðimanna til rannsókna. Fjölmargt má greina í hreistri og t.d. er hægt að sjá hvort fiskur sé af eldisuppruna. Sjá nánar fróðleik um hreistursýnatöku. 

 

Í ljósi þess að mun minna er af laxi í sumum ám þá er ágætt að hafa tilmæli Hafrannsóknastofnunar í huga um að veiðimenn og veiðiréttarhafar gæti hófs við veiðar og sleppi sem allra flestum löxum sem veiðast til að hrygningarstofn haustsins verði sem stærstur.

 

Annars er hætta á að sá seiðaárgangur sem undan þeim kemur verði einnig smár og veiðiþol laxastofna minnki enn frekar. Hér er hægt að lesa áskorun í heild sinni.

 

Athygli er vakin á að velkomið að senda inn veiðitölur úr öðrum vatnakerfum og við birtum þær hér á vefnum. Einna best er að fá veiðitölur í lok veiði miðvikudags kvölds en það gerir samanburð fróðlegri og auðveldari. Gott er að láta stangarfjölda fylgja og veiði á silung er auðvitað vel þegin.

 

Hægt er að senda inn veiðitölur á bjorn@angling eða hringja/senda sms í síma 852-3398.