Veiðitölur
Smelltu hér til að gerast áskrifandi að angling fréttum
13. júní 2019

Veiðitölur 2019

Í rúman áratug hefur Landssamband veiðifélaga safnað vikulega veiðitölum úr 25 ám. Veiðitölum er safnað hvert miðvikudagskvöld og eru þær  birtar á heimasíðu LV, angling.is og jafnframt á síðu 322 á textavarpinu.

Undanfarin tvö ár hefur veiðisvæðum sem við birtum veiðitölur frá fjölgað nánast um um helming og í fyrra voru veiðitölur að berast frá rétt um 50 veiðisvæðum.

 

Sólbjartir dagar og langvarandi úrkomuleysi hefur sett sitt mark á upphaf laxveiðinnar þetta árið og við bætist að síðasti vetur skildi ekki eftir forða sem nú myndi bráðna og liðsinna í þessum aðstæðum en samkvæmt vef Veðurstofunar þá tók snjó upp að mestu í 800 -1200 metra hæð í aprílmánuði.

 

Í stuttu máli þá eru það dragárnar um allt land sem eru orðnar vatnslitlar og í þeim hóp eru Norðurá og Þverá/Kjarará sem nýverið opnuðu en lítið hefur veiðst af skiljanlegum ástæðum. 

 

 

En til að undirstrika hvað aðstæður eru mismunandi þá eru tvö önnur vatnakerfi þar sem laxveiði hófst nýverið en það er Blanda og Urriðafoss í Þjórsá. Þar eru vatnsdrög með öðrum hætti og veiði fer vel af stað.

 

Veiði hefur farið ágætlega af stað í Blöndu en alls höfðu veiðst 54 laxar í lok veiði í gær, miðvikudag 12 júní. Á svipuðum tíma í fyrra höfðu veiðst 52 laxar og árið 2017 höfðu veiðst 66 laxar 14. júní.

 

Veiði hófst í Urriðafossi 1. júní og hefur veiðin farið vel af stað. Alls hafa veiðst 184 laxar og eru fjórar stangir leyfðar. Veiðin 13. júní í fyrra var komin í 211 laxa og árið 2017 var veiðin alls 172 laxar 14. júní en þá voru tvær stangir leyfðar. 

 

 

Stangveiði á svæðinu við Urriðafoss í Þjórsá er samstarfsverkefni landeigenda og Iceland Outfitters og hófst sem tilraunaverkefni árið 2016. Markmið þessa samstarfsverkefnis er að fjölga stangveiðidögum, fækka netaveiðidögum og vonandi að lokum að breyta þessu fallega svæði þannig að þar yrði alfarið stangveiði. Ekki verður annað séð en þetta áhugaverða verkefni gangi með eindæmum vel.

 

Í ljósi þess hve fá vatnakerfi hafa opnað og hve aðstæður eru erfiðar hvað vatnsbúskap varðar þá er fullsnemmt að spá fyrir um þróun mála enda fjölmargt sem getur haft áhrif á veiði en söfnun veiðitalna verður næst miðvikudaginn 19 júní.

 

Á næstu dögum og vikum opna ár hver af annarri og verður áhugavert að fylgjast með en óskandi að vatnsbúskapur færist til betri vegar sem fyrst enda mun hann hafa afgerandi áhrif á veiði í dragánum. 

 

Þess má geta að við höfum átt mjög gott samstarf á liðnum árum við alla þá sem hafa liðsinnt okkur í þessari vikulegu söfnun veiðitalna. Án þeirra væri þetta ekki mögulegt og viljum við þakka kærlega fyrir þeirra framlag.

 

Athygli er vakin á því að þó við erum með 25 gagnagrunnsár, sem við söfnum vikulega gögnum frá, þá er velkomið að senda inn veiðitölur úr öðrum vatnakerfum og við birtum þær hér á vefnum. Einna best er að fá veiðitölur í lok veiði miðvikudags kvölds en það gerir samanburð fróðlegri og auðveldari.

 

Hægt er að senda inn veiðitölur á bjorn@angling eða hringja/senda sms í síma 852-3398.

 

Í ljósi aðstæðna er rétt að geta þess að vegna langvarandi þurrka hefur óvissustigi Almannavarna verið lýsti yfir á Vesturlandi vegna hættu á gróðureldum. Ekki er útilit fyrir úrkomu á svæðinu næstu vikuna svo því er brýnt að fara mjög varlega með eld. Við hvetjum veiðimenn til að gæta vel að allri umgengni og hafa ofangreint í huga.