Veiðitölur
Smelltu hér til að gerast áskrifandi að angling fréttum
8. desember 2018

Kvarta til ESA vegna lagabreytinga um fiskeldi

Fjögur náttúruverndarsamtök, veiðifélög og veiðiréttarhafar hafa kvartað til ESA, eftirlitsstofnunar EFTA, vegna nýlegra lagabreytinga á lögum um fiskeldi. Hópurinn telur að með lögunum sé kæruréttur tekinn af almenningi og þannig brotið á EES samningi, þá sé gengið framhjá rétti umhverfissamtaka og almenningi til að koma að ákvörðunum sem varða umhverfið þegar bráðabirgðaleyfi voru veitt.

 

15 þúsund manns að baki kvörtunum

Náttúruverndarsamtök Íslands, Náttúruverndarfélagið Laxinn lifi, Verndarsjóður villtra laxastofna, umhverfissjóðurinn Icelandic Wildlife Fund, Landssamband veiðifélaga og Stangaveiðifélag Reykjavíkur ásamt nokkrum veiðiréttarhöfum standa að baki kvörtuninni. Þá hefur Landvernd einnig kvartað til ESA vegna laganna og því telur hópurinn að um 15 þúsund manns standi að baki kvörtununum. 

 

Telja að úrskurðir haldi ekki gildi sínu

Úrskurðarnefnd umhverfis- og auðlindamála felldi úr gildi starfs- og rekstrarleyfi fyrirtækjanna Arctic Fish og Arnarlax í Patreks- og Tálknafirði vegna annmarka á umhverfismati. Hópurinn telur lögin og framkvæmd þeirra koma í veg fyrir að fjórir úrskurðir nefndarinnar haldi gildi og að þannig hafi kærurétti umhverfisverndarsamtaka og annarra samtaka almennings verið kippt úr sambandi. Það sé brot á EES-samningnum. 

 

Gengið framhjá rétti almennings

Í greinagerð með frumvarpi laganna kemur fram að ekki sé talið að lögin brjóti á EES samningum þar sem að úrskurðirnir standi áfram, þrátt fyrir lögin og bráðabirgðaleyfi. Hópurinn kvartaði jafnframt vegna bráðabirgðarekstrarleyfanna sem voru veitt í kjölfar lagabreytingarinnar og vegna undanþága umhverfisráðherra fyrir starfsleyfum sömu starfsemi sem hópurinn telur brot á rétti umhverfisverndarsamtaka og almennings til að koma að ákvörðunum sem varða umhverfið.

 

Kvarta til eftirlitsnefndar Árósarsamningsins

Í tilkynningu frá hópnum kemur fram að hann undirbúi jafnframt kvörtun til eftirlitsnefndar með framkvæmd Árósarsamningsins, þá fyrstu frá Íslandi. Hópurinn telji að stjórnvöld meti lítils lýðræðislegt hlutverk umhverfisverndarsamtaka og skuldbindingar sínar gagnvart grundvallarstoðum Árósarsamningsins.

 

Þessa frétt er að finna á vefnum Ruv.is