Veiðitölur
Smelltu hér til að gerast áskrifandi að angling fréttum
12. september 2018

Nýjar veiðitölur

Komnar eru nýjar veiðitölur á vef Landsambands Veiðifélaga. Samantektin er frá veiði í lok miðvikudags 12. september. Veiðin síðustu veiðiviku ber þess merki að liðið er fram á haust og nú byrja að berast lokatölur úr þeim ám sem veiði hófst fyrst í sumarbyrjun.

 

Ekki hafa borist veiðitölur úr öllum ám og í sumum tilvikum skýrist það af því að veiðihús hafa lokað og fyrir vikið er minni viðvera og tækifæri að sækja upplýsingar úr veiðibók/veiðibókum. En tölur skila sér að lokum og verða þær settar inn um leið og þær berast. 

 

Sem fyrr eru Rangárnar í efstu tveimur sætunum. Í efsta sæti er Eystri-Rangá með 3617 laxa og þar hefur veiðin gengið ágætlega en síðasta veiðivika skilaði 131 löxum. Veiðin á svipuðum tíma í fyrra var 1983 laxar og er veiðin nú er því orðin 1634 löxum meiri en í fyrra. Veiðin í Ytri-Rangá er komin í alls 3445 laxa og gekk vel í síðustu veiðiviku sem skilaði 268 löxum.

Miðfjarðará er nú komin í þriðja sætið á listanum og orðin efst á lista náttúrulegu ánna, komin í alls 2509 laxa og skilaði síðasta veiðivika 149 löxum.

 

Þverá og Kjarará er í fjórða sæti, komin í 2455 laxa, og skilaði síðasta vika 11 löxum. Veiði er lokið að undanskilinni Litlu Þverá.

Laxá í Dölum kemur ný á listann og er í tíunda sæti, nálgast þúsund laxa markið en alls hafa veiðst 971 laxar. Á svipuðum tíma í fyrra höfðu veiðst 612 laxar og veiðin nú því orðin 359 löxum meiri. Einnig má geta þess að veiðin nú er orðin 100 löxum meiri en lokatalan í fyrra sem var 871 lax.

 

Komnar eru nokkrar lokatölur. Veiði í Norðurá er lokið, síðasta veiðivika skilaði 82 löxum og alls veiddust 1692 laxar þetta veiðitímabilið. Veiðin er 27 löxum minni er veiðin í fyrra en þá veiddust 1719 laxar.

 

Veiði í Búðardalsá lauk 10 september með samtals 331 lax og skilaði stutt veiðivika 8 löxum. Ef veiðin er borin saman við veiði síðasta árs, sem var 255 laxar, þá er lokatalan nú 76 löxum meiri.

 

Veiði í Straumunum í Hvítá lauk fjórða þessa mánaðar og lokatölur 215 laxar og 152 silungar en það er minni veiði en hefur verið síðustu fimm ár.

 

En veiði heldur áfram í fjölmörgum ám og nokkrar vikur í að veiði ljúki. Það er því þó nokkuð eftir af veiðitímabilinu og hægt að veiða víða um land en flestar náttúrulegu árnar munu vera búnar að loka um næstu mánaðarmót. Veiðar í þeim ám sem byggja á seiðasleppingum verða stundaðar vel fram í október og því ljóst að hægt er að stunda laxveiðar töluvert áfram þetta veiðitímabilið.

 

Hér er listi yfir tíu efstu árnar þessa veiðivikuna. Í sviga fyrir aftan vikuveiði er staða veiði í fyrra 13.09.2017 og plús eða mínus eftir því hvort veiðin sé meiri eða minni en í fyrra.

 

1. Eystri-Rangá 3617 laxar - vikuveiði 131 laxar. (1983)+

2. Ytri-Rangá 3445 laxar - vikuveiði 268 laxar. (6079)-

3. Miðfjarðará 2509 laxar - vikuveiði 149 laxar. (3470)-

4. Þverá og Kjarará 2455 laxar - vikuveiði 11 laxar. (2060)+

5. Norðurá 1692 laxar - vikuveiði 82 laxar. (1719)-

6. Haffjarðará 1545 laxar - vikuveiði 43 laxar. (1167)+

7. Langá laxar 1442 - vikuveiði 47 laxar. (1460)-

8. Selá í Vopnafirði laxar 1315 - vikuveiði 32 (928)+

9. Urriðafoss í Þjórsá laxar 1284 - vikuveiði 27 laxar. (755 lokatala)+

10. Laxá í Dölum 971 laxar - 2 vikuveiði 92 laxar. (612)+

 

Veiðitölur eiga eftir að skila sér úr nokkrum ám og líklegt að listinn hér að ofan breytist aðeins.Tölur verða settar inn þegar þær berast. Hér er hægt að skoða allan listann þar er veiðitölur eru frá tæplega fimmtíu ám.

 

Næstu veiðitölur verða teknar saman í lok veiði miðvikudagsins 19 september.

 

Við bendum á að það er velkomið að senda inn veiðitölur úr öðrum vatnakerfum en þeim sem eru á listanum og við birtum þær hér á vefnum. Einna best er að fá veiðitölur í lok veiði miðvikudagskvölds en það gerir samanburð fróðlegri og auðveldari. Gott er að fá veiðitölu og stangarfjölda. Hægt er að senda inn veiðitölur á bjorn@angling.is eða hringja/senda sms í síma 852-3398