Veiðitölur
Smelltu hér til að gerast áskrifandi að angling fréttum
7. september 2018

Regnbogasilungur slapp úr eldisstöð á Húsavík

Regnbogasilungur slapp úr eldisstöð fyrirtækisins N-lax á Húsavík í síðasta mánuði. Fyrirtækið tilkynnti ekki um óhappið eins og skylt er samkvæmt lögum um fiskeldi. Fiskurinn er ófrjór.
 

Í tilkynningu frá Matvælastofnun segir að við slátrun úr einu keri fyrirtækisins hafi rist losna af niðurfallsröri í kerinu. Fiskar hafi þannig komist í frárennsli stöðvarinnar sem rennur í fráveitukerfi Húsavíkur. Ljóst sé að eldisfiskar bárust í fráveitu bæjarins.

 

„Umfang slysasleppingar er óljóst en það er ekki talið verulegt. Samkvæmt upplýsingum frá N-lax má ætla að um 300 regnbogasilungar hafi verið í kerinu þegar atvikið átti sér stað og uppgefnar sláturtölur gefa til kynna að hátt hlutfall þeirra hafi skilað sér í slátrun,“ segir í tilkynningu Matvælastofnunar. 

Engin hreinsun er í fráveitukerfinu og því ekki hægt að útiloka að lifandi fiskur hafi borist til sjávar. Eldisfiskurinn er ófrjór og getur ekki fjölgað sér í íslenskri náttúru.
 

„Kveikjan að rannsókn málsins var ábending til Matvælastofnunar í lok síðustu viku um slysasleppingu hjá N-lax. Við eftirlit Matvælastofnunar 4. september sl. var farið yfir atburðarás atviksins, búnað og viðbrögð fyrirtækisins. Viðbrögð fyrirtækisins voru ekki skv. skráðu verklagi þess. Jafnframt var Fiskistofu ekki tilkynnt um sleppinguna eins og lög kveða á um. Matvælastofnun tilkynnti Fiskistofu um málið og er það til áframhaldandi skoðunar,“ segir í tilkynningunni frá Matvælastofnun. 

 

Þessa frétt er að finna á vefnum Ruv.is