Veiðitölur
Smelltu hér til að gerast áskrifandi að angling fréttum
17. ágúst 2017

Nýjar veiðitölur

Komnar eru nýjar veiðitölur á vef Landsambands Veiðifélaga. Samantektin er frá veiði í lok miðvikudags 16. ágúst. Eftir veiði síðustu viku bættust engar ár í hóp þeirra sem hafa farið yfir 1000 laxa markið en eru þó tvær að nálgast markið en það eru Haffjarðará með 980 laxa og Grímsá og Tunguá með 844 laxa. Í efsta sæti er Ytri-Rangá en þar gengur veiðin mjög vel, nálgast 4000 laxa markið, komin í alls 3746 laxa og vikuveiðin var 865 laxar. Miðfjarðará er í öðru sæti en alls hafa veiðst 2386 laxar og vikuveiðin var 213 laxar. Í þriðja sæti er Þverá og Kjarará en þar er veiðin komin í alls 1600 laxa en vikuveiðin var 134 laxar. Eystri-Rangá var í sjötta stæti síðustu viku en færir sig upp í fjórða sæti þessa vikuna og komin í alls 1401 laxa en vikuveiðin var 310 laxar. Norðlingafljót færir sig hratt upp listann þessa vikuna eða úr 25 sæti í 15 sæti. Veiðin þar er kominn í 548 laxa og vikuveiðin var 293 laxar.

 

Veiðin gekk misvel á ánum okkar í síðustu viku og sumstaðar hafa skilyrði til veiða verið fremur dræm sökum úrkomuleysis og bjartviðris t.d. á vesturlandi. En líklegt er að veiðin taki góðan kipp þegar skilyrði batna.

 

Nú þegar eru nokkrar ár komnar með meiri veiði en lokatalan var í fyrra og má þar nefna Grímsá og Tunguá, Elliðaárnar, Laxá á Ásum og Straumanir í Hvítá. Líklegt er að fleiri ár bætist í þennan hóp á næstu vikum og má þar t.d. nefna Norðurá sem vantar 40 laxa upp á að vera á pari við lokatölur síðasta árs. 

Hér fyrir neðan er listi yfir efstu 10 árnar þessa vikuna.

 

1. Ytri-Rangá 3746 laxar - vikuveiði 865 laxar.

 

2. Miðfjarðará 2386 laxar - vikuveiði 213 laxar.  

 

3. Þverá og Kjarará 1600 laxar - vikuveiði 134 laxar.

  

4. Eystri-Rangá 1401 laxar - vikuveiði 310 laxar.

 

5. Blanda 1331 laxar - vikuveiði 112 laxar.  

 

6. Norðurá 1302 laxar - vikuveiði 74 laxar.

  

7. Langa 1149 laxar - vikuveiði 75 laxar.

 

8. Haffjarðará  980 laxar - vikuveiði 68 laxar.

 

9. Grímsá og Tunguá 844 laxar - vikuveiði laxar 56.

  

10. Elliðaárnar 741 laxar - vikuveiði 36 laxar.

 

Hér er hægt að skoða allan listann með tölum úr um 40 ám.

 

Veiðitölur hafa ekki borist úr öllum ám en tölur verða skráðar inn þegar þær berast.

 

Við tökum saman tölur næsta miðvikudag 23. ágúst og verður fróðlegt að sjá hvernig gengur.

 

Landssamband veiðifélaga hefur um áratug fylgst með veiði í 25 ám. Veiðitölum er safnað hvert miðvikudagskvöld og eru þær birtar á heimasíðu Lv, angling.is og jafnframt á síðu 322 á textavarpinu. Velkomið er að senda veiðitölur í tölvupóst bjorn@angling.is eða senda sms í síma 852-3398. Gott er að láta stangarfjölda fylgja með.  

 

Söfnun veiðitalna væri ekki möguleg nema fyrir liðsinni fjölda aðila sem vikulega taka saman veiðitölur. Kærar þakkir fyrir ykkar liðsinni í veiðitölusöfnun.