Veiðitölur
Smelltu hér til að gerast áskrifandi að angling fréttum
26. janúar 2017

Landssamband veiðifélaga kærir sleppingar á regnbogasilung

Landssamband veiðifélag hefur kært sleppingu regnbogasilunga úr fiskeldi á Vestfjörðum til lögreglu. Undanfarna mánuði hefur regnbogasilungur komið fram í veiðum í fjölmörgum ám víða um land. Þetta kemur fram í tilkynningu frá félaginu.

Þar segir:

„Mikið af regnbogasilungi kom fram í ám á Vestfjörðum en einnig veiddist silungurinn á Vatnsdalsá, Haffjarðará, Hítará á Mýrum og fleiri ám. Ljóst er að mikið magn regnbogasilungs hefur sloppið úr eldi sé horft á dreifingarsvæði regnbogans.“

Á það er bent að samkvæmt lögum ber að tilkynna um slysasleppingar án tafar til Fiskistofu en ljóst megi vera að engar slíkar tilkynningar hafi borist. Óhugsandi sé að fiskur sleppi úr sjókvíum í þeim mæli sem vísbendingar eru um án vitundar rekstrarleyfishafa.

„Landssambandið telur brýnt að upplýsa hvort hér sé um saknæman atburð að ræða sem kann að varða refsiábyrgð forsvarsmanna viðkomandi fyrirtækis eða fyrirtækja.

Landssambandið telur að þessi atburður sé alvarleg birtingarmynd á slælegu eftirliti með sjókvíaeldi á Ísland og lýsir þungum áhyggjum af skeytingarleysi stjórnvalda í þeim efnum,“ segir í tilkynningunni.