Veiðitölur
Smelltu hér til að gerast áskrifandi að angling fréttum
10. mars 2016

Fiskstofnar Veiðivatna á Landmannaafrétti

Á morgun, föstudaginn 11. mars, mun Magnús Jóhannsson fiskifræðingur á Veiðimálastofnun flytja erindi um rannsóknir sínar á fiskstofnum Veiðivatna. Erindið verður flutt á svokölluðum föstudagsfyrirlestri líffræðistofu HÍ. Viðburðurinn verður haldinn í stofu 131 í Öskju, náttúrufræðihúsi HÍ og hefst kl. 12:30 stundvíslega. Erindið nefnist Fiskstofnar Veiðivatna á Landmannaafrétti.

Magnús að störfum í Veiðivötnum. Mynd ©Veiðimálastofnun
 

Ágrip:

Veiðivötn eru vatnaklasi norðan Tungnaár á Landmannaafrétti. Vötnin eru á vatnsríku, eldvirku og frjósömu lindarsvæði. Tvær fisktegundir, urriði (Salmo trutta) og hornsíli (Gasterosteus aculeatus), eru í vötnunum frá náttúrunnar hendi. Bleikja (Salvelinus alpinus), komst þangað af sjálfsdáðum upp úr 1970 eftir sleppingar í nálæg vötn. Vötnin hafa lengi verið nytjuð með blandaðri stanga- og netaveiði. Árið 1985 hóf Veiðimálastofnun árlegar vöktunarrannsóknir á fiskstofnum vatnanna. Markmið rannsóknanna er að vakta fiskstofna svæðisins, með árlegu mati á ástandi urriðastofna og landnámi bleikju. Fiskar í Veiðivötnum búa við harðbýl náttúrufarsleg skilyrði, vetur eru kaldir og sumur stutt. Óvíða eru góð hrygningarbúsvæði fyrir urriða þar sem er möl og vatnsrennsli.

 

Urriðar í Veiðivötnum eru síðkynþroska, verða flestir kynþroska við 7 til 9 ára aldur, þá um 45 cm langir og um 1,3–1,5 kg að þyngd. Vaxtarhraði og kynþroskastærð er að hluta erfðabundnir eiginleikar, en góður vöxtur urriðanna er líklega vegna ríkulegs fæðuframboðs. Fæða urriðanna í Veiðivötnum er aðallega smádýr sem tekin eru af botni. Vatnabobbi (Lymnaea peregra) er lang algengasta fæðan en skötuormur (Lepidurus arcticus) er einnig mikilvæg fæða sem og hornsíli og lirfur rykmýs og vorflugna.

 

Bleikju fer fjölgandi í mörgum þeim vötnum sem hún hefur borist í. Í þessum vötnum hefur urriðastofninn hopað.  Miklar sveiflur koma fram í afla urriða en veiði á flatareiningu er svipuð og í frjósömum láglendisvötnum hérlendis.

 

Þessa frétt er að finna á vef Veiðimálastofnunar.